البوتوكس مش بس تجاعيد: 5 استخدامات مختلفة للبوتوكس

المفهوم الشائع عند غالبية الناس هو أن البوتوكس بيستخدم في محاربة التجاعيد فقط، ومع أنه فعلا بيستخدم للتخلص من التجاعيد، إلا أن له استخدامات كثيرة جدا ما نقدرش نجمعها كلها هنا. علشان كده قررنا نقولكم النهاردة على 5 استخدامات جديدة للبوتوكس ممكن تكونوا متعرفوهاش ومشاكل متتوقعوش أن البوتوكس ممكن يعالجها.

البوتوكس هو أشهر علاج غير جراحي بيستخدم في مجال التجميل حول العالم، و مادة البوتوكس بتسخرج من مصادر طبيعية. ولما بيتحقن في أماكن مختلفة من الجسم بيعالج مشاكل كثيرة مختلفة، لأن البوتوكس مش بس للإستخدام التجميلي فقط، لأن له استخدامات علاجية و طبية كمان.

الإبتسامة اللثوية

لو بتخافي تضحكي من قلبك عشان ابتسامتك اللثوية ماتبانش وفاكرة ان ابتسامتك ملهاش علاج، يبقى لازم تعرفي أن جلسة بوتوكس واحدة ممكن تخلصك منها لمدة تدوم من 6 شهور الى سنة. بكل بساطة ابتسامتك اللثوية سببها أن شفتك العليا بتترفع فوق زيادة لما بتضحكي، عشان كده لما بنحقنها بوتكس بكمية بسيطة ده بيقلل من ارتفاعها لفوق و بكدة تحصلي على ابتسامة جميلة بدون خوف.

التعرق المفرط

واحدة من المواقف اللي بتسبب احراج الى ناس كثير هي التعرق المفرط، وده لأنه ممكن يسبب الإحراج في شكل اللبس أو حتى في السلام على الأشخاص اللي بتقابليهم. مع أن ممكن تفتكري أن المشكلة دي مالهاش حل، لكن الحل هو البوتوكس، لأن حقن البوتوكس بتهدي الغدد العرقية اللي فيها نشاط زايد و بتسبب التعرق المفرط، سواء في اليدين أو الإبطين.

التخلص من حب الشباب

تعرفي أن لو كل محاولات علاج حب الشباب فشلت، دايما في حل تاني. طيب تعرفي أن في أطباء بتنصح باستخدام البوتوكس كعلاج لحب الشباب كحل أخير. استخدام البوتوكس بكميات قليلة لعلاج حب الشباب بيقلل من إفراز البشرة للدهون، عشان يساهم في علاج بشرتك.

الجز على الأسنان

مشكلة الجز على الأسنان سببها في الأغلب بيكون عضلات الماضغة مشدودة و متوترة، علشان كده بعض الدكاترة بتنصح بحقن البوتوكس عشان ترخي العضلات وتقلل من الضغط على الفك والجز على الاسنان.

الصداع المزمن

الناس اللي بتعاني من الصداع المزمن وحاسين أن مافيش امل انهم يتخلصوا منه، الأبحاث بتبين أن استخدام البوتوكس لعلاج الصداع المزمن، بيقلل بشكل واضح من نوبات الصداع كل شهر. عشان حياة اسهل و بدون ألم و بحل بسيط.